රහස් නිවස හා එහි ජීවිතය

මර්වෙඩ්ප්ලේයින් සිට  ප්‍රින්සෙන්ග්‍රාච්ට් කැනල් දක්වා වූ කිලෝමීටර් පහකට ආසන්න දුරක් තමා ඒ ආ ගමන ගැන ඇය මෙසේ ලීවාය.
ඇඳුමේ පැහැදිලිව පෙනෙන්නට තිබූ කහ තරුව නිසා ඒ උදෑසන අපිට උදව්වක් කරන්න බැරිවීම ගැන, මඟදි හම්බ උන අය ඇත්තටම දුක් වෙනවා කියලා මට එයාලගේ මූණු දැක්කාම හිතුනා -1942 ජූලි 9-
උදෑසනින්ම මියැප්  ගීස් සමඟ බයිසිකල් වලින්  පිටත් වූ මාගෝ ඒ වන විටත් ප්‍රින්සෙන්ග්‍රාච්ට් නිවසේ ඔවුන්  එනතුරු බලා සිටියාය.
ඇයට පිටු පසින් වූ නිවස එකම අවුල් ජාලයක් වූ බව ඈන් මෙසේ ලීවාය.
ගෙදර ආපු ගමන්ම පුංචි විවේකයක් වත් නොගෙන අපි වැඩ පටන් ගත්තා.මුළු දවසම පණ නැති වෙනකන්ම අස්පස් කරන,පිරිසිදු කරන  වැඩ ඇරෙන්න වෙන කිසිම දෙයක් හිතන්නවත් මට විවේකයක් ලැබුනේ නෑ.ඒත් එදා රෑ අපි පිරිසිදු  නිවසක, ඇඳන් වල  නින්දට ගියා.-1942 ජූලි 10-
පොලවට සවි කර ඇති ලී ශබ්ද නොකරමින් ඇවිදීමටත්,ඉතා සිහින් හඬින් කථා කිරීමටත් ඔවුන්ට සිදුවිය.දහවල් කාලයේ පහල මාලයේ ගබඩාවේ සේවය කරන අයට රහසින් සැඟ වෙන්නටත්,අසල්වාසීන්ගේ දෑසට හසුවීමෙන් වැලකෙන්නටත් ඉතා දැඩි වෙහෙසක් ගත යුතු විය.
නිවසින් පිටත ලෝකය ගැන ඔවුන් දැනගත්තේ උදව් කාරයන් ගෙන එන පොත් හා පුවත් පත් මඟිනි.ඈන්ගේ ලෝකය අට්ටාලයේ ජනේලයෙන් ඇයට පෙනෙන චෙස්නට් ගසටත්,නිල් අහසටත්,වෙස්ටටෝරන් හෝරා කුළුනටත්,නිවසේ කාමර කීපයටත් සීමාවී තිබුණි.

ඉතා දීර්ඝවූ දහවල් කාලවලදී මාගෝ,ඈන් හා පීටර් වෑන් පෙල්ස් තම තමා ගෙනවිත් තිබූ පාසල් පොත් වල අධ්‍යයන කටයුතු කරමින් කාලය ගත කල අතර,මියැප් විසින් ගෙනවිත් දුන් පොත්  රාශියක් කියවුවෝය.ඊට අමතරව ඔවුන් ලඝු ලේඛණය හැදෑරීමද ආරම්භ කර තිබුණි.ළමුන් තිදෙනාටම පාසල් වැඩ සඳහා ඔටෝ ගේ උපකාර ලැබුණු අතර ඉක්මනින්ම යලි පාසල් යන්නට හැකි වනු ඇතැයි ඔවුන් මහත් බලාපොරොත්තු තබාගෙන සිටියහ. කෙසේ වූවද කුඩා නිවසක සිරවී ගෙවන මේ රහස් ජීවිතය ඉතා අසීරු බව සියල්ලන්ටම වැටහී යමින් තිබුණි.
මව හා නිතරම වාදයට පැටළුණු ඈන්,සමඟ මාගෝ  සුපුරුදු පරිදි  නිතරම උරණ වූවාය.ඕනැම විටෙක ඕනෑම කෙනෙකු හා වාදයකට ඇගේ ළඟ වචන තිබුණි.
ඇගේ සිත රහසින් පෙලූ මේ සිදුවීම් ඇය දින පොතේ ලියන්නේ මෙහෙමයි.
මාගොයි පීටරුයි ඔය කියන තරම් ඇත්තටම හොඳද??දෙන්නම හරිම නිහඬයි..ඒක නිසා ඒ ගොල්ලොත් එක්ක බලද්දින්  මාව පේන්නේ ලොකු කලබලයක් වගේ.මට හැම වෙලාවෙම ඇහෙන්නේ’මාගොයි පීටරුයි කොයි වෙලාවකවත් ඔහොම නෑ.ඇයි ඔයාට බැරි අක්කා වගේ  ඉන්න’.මට නම් ඒ කථාව පෙන්නන්න බෑ.-1943 පෙබරවාරි 05-

~මතු සම්බන්ධයි~

1942 ජූනි 12 වෙනි සිකුරාදා

ඈන් ලියා අප කියවූ ඇගේ ආදරණීය දිනපොත තමන්ගේ දහතුන් වන උපන්දිනය දා දෙමාපියන්ගේ තිළිණය ලෙසින් ඇය අතට පත්වන්නේ ඒ උදෑසනයි.රතු හා සුදු කොටු සහිත රෙදි  කවරයකින් යුතුවූ මේ දින පොත ඇය එදින ලද සුවිශේෂතම තෑග්ග වූවා සේම, මෙහි ලියවෙන දෑ යුද්ධයකදී ජන සමාජය කොතරම් පීඩාවකට පත් වන්නේද යන්න  උදාහරණ සහිතව ලෝකයට  පෙන්වාදෙන වැදගත් සාධකයක් වනු ඇතැයි, එදා ඈන් වත් ඇගේ දෙමාපියන්වත් නිකමට වත් නොසිතන්නට ඇති.

තම අලුත් මිතුරාට ‘කිටී’ යැයි නම් තැබූ ඇය එදිනම දින පොතේ පළමු සටහනද තැබුවාය. “මෙච්චර දවස්  මට කිසිම කෙනෙක් විශ්වාස කරන්න පුළුවන් කමක් තිබුණේ නැහැ. ඒක නිසා  ඔයා ගැන විශ්වාස කරලා, හැමදේම ඔයාට  කියන්න  පුළුවන් වෙයි කියලා මම  බලාපොරොත්තු  වෙනවා. ඔයා මට මගේ හිත සනස ගන්න උදව්වෙන  හොඳ යාලුවෙක් වෙයි කියලත් මම හිතනවා.”  -ඈන් ෆ්‍රෑන්ක්-

ජූනි 14 වන ඉරිදා පටන්,එදිනෙදා ජීවිතයේ සිදුවෙන සිදුවීමුත් තමන්ට අන් අය ගැන සිතෙන දේත්, තමාගේ පාසැලත් මිතුරනුත් පිළිබඳව ඉඩ කඩ ලැබෙන අයුරින් ඇය දින පොතේ  සටහන් කර තැබුවාය.
යුදෙව්වන්ට අයිති ව්‍යාපාර රජයට පවරා ගැනීමේ අවධානමෙන් ගැලවෙන්නට ඇගේ පියා සිය ව්‍යාපාර වල අයිතිය  1941 දී වික්ටර් කුග්ලර්ටත්[Victor Kugler] ජොහැනස්  ක්ලීමන්ටත් [Johanes Kleiman]  පවරා දී  තිබුණේය.
ඒ හේතුවෙන් ඔහු දහවල් දවස පුරාම නිවසේ ගත කලේය.එය ඉතා අසීරු කටයුත්තකැයිද සිය පියා ඉන් දැඩි ලෙස සිත් වේදනාවට පත් වී ඇතැයිද සිතූ ඈන් ඒ ගැන පියා හා කතා බහ කලාය.
1942  ජූලි  5 වන ඉරිදා ඇය දින පොතේ ඒ ගැන මෙලෙස සටහන් තබන්නීය.
ටික දවසකට කලින් අපිට හැංගිලා ජීවත්වෙන්න සිද්ධ වෙන්නත් පුළුවන් කියලා
තාත්තා මාත් එක්ක කිව්වා.මේ ගෙවන ජීවිතෙන් ඈත්වෙලා තනියම ඉන්න එක අපිට  අමාරු වෙන්න පුලුවන්..,
ඒත් ඇයි මේ හදිසියේ..??  මම ඇහුවා.ඈන්…, අපිට අවුරුද්දකට විතර ඕනෙ වෙන ඇඳුම්, කෑම බීම මම වෙන තැනකට යැව්වා.ජර්මන් කාරයෝ අපිව අල්ල ගන්නකම් හරි,අපේ දේවල් උදුර ගන්නකම් හරි බලා ගෙන ඉන්න ඕනේ නෑනේ..අපි කැමැත්තෙන්ම පිටවෙලා යමු.
ඒත් කවදද ?? මට ඇත්තටම බය හිතුන නිසා මම හොඳටම කලබල උනා.
බයවෙන්න එපා.හැමදේම ලැස්ති කරන්නම්.එතකන් ඔයා සතුටින් ජීවත් වෙන්න.තාත්තා කිව්වේ එච්චරයි.
අනතුරු ඇඟවීම සත්‍යයක් බව පසක් කරමින් එදාම හවස වැරදී යාම් ඇරඹෙන්නට විය.  සවස් වරුව විවේකයෙන් ගත කරමින් සිටි ඈන් වෙත කලබලයෙන් දිව ආ මාගෝ,  කනට කොඳුරා කියූ දෙයින් ඇය වික්ෂිප්ත විය. ‘තාත්තට එස් එස් වලින් එන්න කියලා පණිවිඩයක් ලැබිලා.’
සියල්ල  නොදැන සිටි මුත් ඒ පණිවිඩය අවසානය වෙත  කල ඇරයුමක් බව  වටහා ගන්නට ඇය මොහොතකින් සමත් වූවාය. ටික වේලාවක් මං දිහා බලා ගෙන හිටපු මාගෝ කැඳවීම පියාට නොව තමාට බව කිව්වා.මාගෝට වයස 16 යි, ඒ වයසේ අයත් උන් අරන් යනවද ?? ඇත්තටම, තනියම.මට හොඳටම බය හිතුනා. මම දන්නෙම නැතුව මට ඇඬුණා. -1942 ජූලි 8-
ජූලි 16 වනදා තෙක් නිවසේම රැඳී සිටීමට සිතා සිටිමුත්, මාගෝ එස් එස් හමුදා වෙතින් ලද හදිසි කැඳවීමෙන් පසුව සැඟවී යාම පසුදාම සිදුකල යුතු බව දෙමාපියන් තීරණය කරන්නට ඇත.
ගෙවුනු කලබලකාරී  දින තුන ගැන සියලුම තොරතුරු සටහන් කරමින් ඇය තවදුරටත් මෙසේ ලියන්නීය.
පහුවදා උදේ පාන්දරම අම්මා මාව ඇහැරෙව්වා.වසර ගණනාවක් ජීවත් වූ නිවස අතහැර යන්නට කාලය එළැඹ තිබිණි.

අපි අපිට පුළුවන් තරම් ඇඳුම් ඇඳ ගත්තා.එතකොට අපිට ඇඳුම් ගොඩක් අරගෙන යන්න පුළුවන්නේ.මොකද මේ වගේ ගමනකදී ඇඳුම් පිරුණු සූට්කේස් එකක් අරගෙන පාරට බහින්න පුළුවන් කමක් නෑනේ.උදේ හතයි තිහට අපි ගෙදරින් පිට උනා..-1942 ජූලි 08-
තමන් සැඟවෙන්නට යන තැන ඒ  වනතුරුත් ඈන් දැන සිටියේ නැත.
‘යුදෙව්වන්ට පොදු ප්‍රවාහන සේවා පාවිච්චිය තහනම් කරලා තිබූනා,ඒ වගේමයි අපේ බයිසිකලුත් අපි බාරදීලයි තිබුණේ.ඒ නිසා අපි පයින්ම ඇවිදගෙන ගියා.-1942 ජූලි 09-
සැඟවෙන ස්ථානය සිය පියාගේ ප්‍රින්සෙන්ග්‍රාන්ච්ට් කාර්යාලයේ පිටුපස ඇනෙක්සිය  බව ඈන් දැන ගන්නේ ඒ අතරතුරයි.

~මතු සම්බන්ධයි~

ඈන් ෆ්‍රෑන්ක් සොයා ගියෙමි

1929  ජූනි  12 වෙනිදා ජර්මනියේ ෆ්‍රෑන්ක්ෆර්ට් ඇම් මෑන්[Frankfurt Am Main] නගරයේදී  පවුලේ දෙවන දියණිය ලෙස  ඈන් ෆ්‍රෑන්ක් [Anneliese Frank]උපත ලැබුවාය. ඔටෝ ෆ්‍රැන්ක් [Otto Frank] ඇගේ පියා වූ අතර මව එඩිත් ෆ්‍රෑන්ක් හෝලැන්ඩර් [Edith Frank-Hollaender]වූවාය.ඈන්ට වඩා වසර තුනකින් වැඩිමල් ඇගේ සොයුරිය මාර්ගෝ ෆ්‍රෑන්ක්ය[Margot Frank].ඔවුන් යුදෙව් ජාතිකයන් වූහ.

1933 දී  ජනවාරි මාසයේදී  හිට්ලර් ජර්මානු පාලකයා ලෙස බලයට පත්විය.1933 මාර්තු 13 වෙනිදා ෆ්‍රෑන්ක්ෆර්ට් නගර සභාවේ ඡන්දය පැවැත්වූ අතර හිට්ලර්ගේ නාසි පක්ෂය ජනතාවගේ වැඩි ඡන්දයෙන් බලයට පත් වුනි.දිළිඳු කමින් හා රැකියා විරහිත භාවය ඉහල යමින් තිබුණු දුෂ්කර කාලයකට ජර්මානුවන් මුහුණ දෙමින් සිටියහ.මේ තත්වයට වගකිව යුත්තේ යුදෙව්වන් යැයි කියමින් හිට්ලර්  යුදෙව්වන් කොන් කිරීමටත්වද හිංසා කිරීමටත් ආරම්භ කර තිබුණි.විදුලිය කැවූ කම්බි වැටවල් සහිත වෙන් කර තැබීමේ කඳවුරු හෙමින් සීරුවේම ඉදිවෙමින් පැවතුනි.

මෙසේ  යුදෙව්වන්ට එරෙහිව හිට්ලර්ගේ පාලනයෙන් එල්ලවූ දැඩි බලපෑම් හමුවේ ෆ්‍රැන්ක් පවුල ඕලන්ද දේශ සීමාවේ පිහිටි ජර්මන් නගරයක් වූ ආචන්[Aachen] හී පදිංචියට ගියහ. ඒ අතර නෙදර්ලන්තයේ සිය ව්‍යාපාරික කටයුතු ඇරඹීමේ බලාපොරොත්තුවෙන් ඔටෝ ෆ්‍රෑන්ක් ඇම්ස්ටර්ඩෑම් නගරය බලා පිටත්ව ගියේය.

ඒ වසරේම දෙසැම්බරයේ වැඩිමහල් දියණිය  කැටුව ඈන්ගේ මව ආචන් හී සිට ඇම්ස්ටර්ඩෑම් නගරයේ පදිංචියට ගියාය. 1934 පෙබරවාරි මාසයේදී එතෙක් සිය මිත්තණිය හා ආචන් හී සිටි ඈන්ද  මර්වෙඩ්ප්ලේන්හී සිය පවුල  සමඟ එක්වූවාය.රහස් ඇනෙක්සියේ සැඟවෙන්නට යනතුරු ඔවුන් ජීවත් උනේ ඒ නිවසේයි.ඒ වසරේම සිය පාසල් ගමන ඇරඹූ ඈන් සොයුරියගේම පාසලේ ප්‍රාථමික අංශයට ඇතුලත් වූවාය.

කාලය සෙමින් ගෙවී යද්දී 1940 මැයි 10 වනදා රොටර්ඩෑම් නගරයට බෝම්බ හෙලමින් හිට්ලර්ගේ  නාසි හමුදා නෙදර්ලන්තය ආක්‍රමණය කලා.වසර අවසාන වන විට රටේ සියලු පුර වැසියන් ලියාපදිංචි කල පාලකයින් හදුනාගැනිමේ කාඩ් පතක්ද නිකුත් කරන ලදී.යුදෙව්වන්ගේ හදුනාගැනීමේ කාඩ් පතේ ජේ ‘J’ අකුර සටහන් කරන ලදි.

1940 දෙසැම්බර් පලවෙනිදා ඔටෝගේ ව්‍යාපාරික ස්ථානය ප්‍රින්සෙන්ග්‍රාච්ට් 263 ලිපිනයේ ඇති ගොඩනැගිල්ලට ගෙන යන ලදී.පසු කලෙක ඈන් ඇතුලු පවුලට දෙවසරකටත් අධික කාලයක් රහසේ සැඟව සිටින්නට උපකාරී වුයේ මේ කාර්යාලයේ පිටුපසින් තිබූ ඇනෙක්සියයි.

1942 මැයි මාසයේ සිට අවුරුදු හයට වැඩි සෑම යුදෙව් ජාතිකයෙක්ම ඩේවිඩ්ගේ තරුව ලෙස හැඳින්වූ යුදෙව්වා  යනුවෙන් සඳහන් කහ පැහැති තරුවක් පැලදීම අනිවාර්ය කෙරුණි.කොන් කිරීම් ස්ථිර වෙමින්  තිබුනි.

Next Newer Entries